হৰ ঘৰ ত্ৰিৰংগা : গোলাঘাটত আত্মসহায়ক গোটৰ ডেৰ লাখ ৰাষ্ট্ৰীয় পতাকা প্ৰস্তুতকৰণৰ লক্ষ্য নিৰ্ধাৰণ, এইবাৰ গোলাঘাটত ঘৰে-ঘৰে ৰাষ্ট্ৰীয় পতাকা উত্তোলনৰ আহ্বান জিলা উপায়ুক্তৰ

32
হৰ ঘৰ ত্ৰিৰংগা : গোলাঘাটত আত্মসহায়ক গোটৰ ডেৰ লাখ ৰাষ্ট্ৰীয় পতাকা প্ৰস্তুতকৰণৰ লক্ষ্য নিৰ্ধাৰণ, এইবাৰ গোলাঘাটত ঘৰে-ঘৰে ৰাষ্ট্ৰীয় পতাকা উত্তোলনৰ আহ্বান জিলা উপায়ুক্তৰ
দুৰ্নীতিৰ দৰ্পণ সেৱা,বিনোদ কুমাৰ নাথ গোলাঘাট, ২১ জুলাই : গোলাঘাট জিলাতো অহা ১৩ আগষ্টৰ পৰা ১৫ আগষ্টলৈ ঘৰে-ঘৰে ৰাষ্ট্ৰীয় গৌৰৱৰ প্ৰতীক ৰাষ্ট্ৰীয় পতাকা উত্তোলনৰ কাৰ্যসূচী ‘হৰ ঘৰ ত্ৰিৰংগা’ সফল কৰি তোলাৰ উদ্দেশ্যে অসম ৰাজ্যিক গ্ৰামীণ জীৱিকা অভিযান, গোলাঘাটৰ অধীনত আত্মসহায়ক গোটসমূহে ৰাষ্ট্ৰীয় পতাকা প্ৰস্তুতকৰণৰ কাম অব্যাহত ৰাখিছে । জিলাখনত বিভিন্ন আত্মসহায়ক গোটে ডেৰ লাখ পতাকা প্ৰস্তুতকৰণৰ বাবে লক্ষ্য নিৰ্ধাৰণ কৰিছে । বিভিন্ন উন্নয়ন খণ্ডৰ অধীনত ঠায়ে ঠায়ে ৰাষ্ট্ৰীয় পতাকা বিক্ৰী কেন্দ্ৰ স্থাপন কৰা হৈছে । উপায়ুক্ত মৃগেশ নাৰায়ণ বৰুৱাই আজি অসম ৰাজ্যিক গ্ৰামীণ জীৱিকা অভিযান, গোলাঘাটৰ জিলা প্ৰকল্প প্ৰবন্ধকৰ পৰা কেইবাখনো পতাকা ক্ৰয় কৰি এই কাৰ্যসূচীৰ সফল ৰূপায়নৰ উদ্দেশ্যে ৰাইজক ব্যাপক ৰূপত অংশগ্ৰহনৰ বাবে আহ্বান জনায় । জিলা পৰিষদৰ মুখ্য কাৰ্যবাহী বিষয়া ধীৰাজ দাসেও কেইবাখনো পতাকা ক্ৰয় কৰি এই কাৰ্যসূচীত অংশ লয় । উল্লেখযোগ্য যে , এই কাৰ্যসূচীৰ অধীনত জিলাখনৰ প্ৰতিটো উন্নয়ন খণ্ডতে আত্মসহায়ক গোটৰ দ্বাৰা ৰাষ্ট্ৰীয় পতাকা প্ৰস্তুত কৰি থকা হৈছে । আনহাতে জিলা গ্ৰামোন্নয়ন অভিকৰণৰ প্ৰকল্প সঞ্চালক অবিনাশ শইকীয়াই আজি কেইবাটাও স্থানত এনে বিপনী মুকলি কৰে । গোলাঘাট পশ্চিম উন্নয়ন খণ্ড, বোকাখাতৰ অধীনত উন্নয়ন খণ্ড বিষয়াৰ কাৰ্যালয়ৰ সন্মুখত আৰু গোলাঘাট উত্তৰ উন্নয়ন খণ্ড, দেৰগাঁৱৰ অধীনত কুৰালগুৰি চাৰিআলিত স্থাপন কৰা বিপনীৰ পৰা জনসাধাৰণে অতি কম মূল্যত ৰাষ্ট্ৰীয় পতাকা ক্ৰয় কৰিব পাৰিব বুলি তেওঁ জানিবলৈ দিয়ে ।